એક શાક; ફુલેવર

શાકમાં વપરાતી એક જાતની વનસ્પતિ. તેનું શાક ઘણું સ્વાદિષ્ઠ થાય છે અને તેથી સર્વ પ્રદેશમાં તેનો ખપ ઘણો જ છે. ફૂલકોબીનાં ફૂલ જથ્થામાં પાતરાં વચ્ચે સફેદ રંગનાં થાય છે. તે ઊઘડ્યાં ન હોય અને કળીઓ હોય ત્યાંજ તેને વચ્ચેથી કાપી લઈ શાક કરવામાં વપરાય છે. કોબી ફલાવર નાજુક હોઈ તેના વાવેતર માટે બહુ કાળજી રાખવી પડે છે. ભાઠાની, ગોરાડુ તથા ફળદ્રુપ જમીન કોલી ફલાવરના વાવેતર માટે પસંદ કરવી. જમીન ઉનાળામાં ખૂબ ખેડી ને ઢેફાં ભાગી ખૂબ બારીક રજકણવાળી કરવી. પછી તેમાં એક એકરે ૧૦ ગાડાં ગળતિયું ખાતર નાખવું. કોબી ફલાવર માટે સારામાં સારૂં ખાતર ખોળ છે. ઓગસ્ટ માસમાં ક્યારા બાંધવા અને પછી તેમાં ફલાવરના તૈયાર કરેલા રોપા દોઢ દોઢ ફૂટને છેટે વાવવા. કોલી ફલાવરના રોપા કરવાના ક્યારામાં લીંડીનું તથા બીજું ગળતિયું ખાતર નાખી તેને કોદળીથી ખોદી નાખવા. પછી બી વગેરે પણ તેમાં નાખવાં. ક્યારમાં પાણી પાવું અને બી હારમાંથી છૂટું છૂટું દાબી ઉપર બારીક રેતી છાંટી ક્યારા ઝાડના છાંયા નીચે કરવા. ખુલ્લી જગા હોય તો છાંયો કરી લેવો. ક્યારાને તડકો આવવાથી રોપા બળી જાય છે. રોપા બહાર ફૂટી નીકળે એટલે પછી છાંયો થોડો થોડો ઓછો કરતાં જવો. ચાર ફૂટથી પહોળો ક્યારો રોપા માટે ન કરવો. લાંબો તે ગમે તેટલો હોય. અઢી રૂપિયાભાર બી ૫૦ ચોરસફૂટના ક્યારા માટે બસ છે. તેટલાં બીના રોપા એક એકર જમીન માટે પૂરતા છે. ઓગસ્ટની સપ્ટેમ્બર પૂરો થતાં સુધી દરરોજને આંતરે અવારનવાર રોપા માટે બી વાવતા જવાં એટલે આગળપાછળ કોલી ફલાવરની ઊપજ આવતી રહે. જો કોલી ફલાવર વાવવાની ને રોપા કરવાની જમીનમાં જંતુ લાગુ પડે એવું હોય તો તેના ઉપર સૂકું ઘાસ, પાતરાં, ડાંખળી વગેરેનો પાથરો કરી તેને સળગાવી દેવી. બાદ સો ચોરસફુટ જમીન માટે બે રતલ સુરોખારનું પાણી કરવું અને તે વડે ક્યારા પાવા. આ ક્રિયા પંદર રોજ બી વાવ્યા પહેલાં કરવી. જ્યારે રોપામાં પાંચ પાંચ પાંદડાં દેખાય એટલે તેને અઢી અઢી ફૂટને છેટે એકબીજાથી સામેની દિશામાં વાવવા. રોપાને ફેરવીને વાવવા ટાણે વાદળાં જોઈએ અગર સાંજના ભાગમાં તડકો ન હોય ત્યારે વાવવા અને પાણી પાવું. બાદ વખતોવખત પાણી પાતા રહેવું ને જમીન ખૂરપીથી પોચી રાખ્યે જવી ને તેમાં બિલકુલ નિંદામણ થવા દેવું નહિ. કોલી ફલાવર ઘણી કોમળ જાત હોઈ ને તેની ખૂબ સંભાળ તેમ જ ધ્યાન રાખવું ઘટે. ખાસ ધ્યાન સંપૂર્ણ પાણીના વહેવા ઉપર રાખવાનું છે. એટલા માટે જમીન ૬થી૮ ઇંચ ઊચી રાખવી પડે છે, કે જેથી પાણી ક્યારામાં ભરાઈ ન રહે.